Nascu lou 8 d’avoust de 1818 à Sant-Roumié-de-Prouvènço ounte passara sa vido, aquest escrivan francés d'espressioun prouvençalo es l'un di 7 sòci foundadou dóu Felibrige emé Frederi Mistral Teoudor Aubanel, Jan Brunet, Ansèume Mathieu, Pau Giéra e Anfos Tavan.

Journalisto e pouèto prouvençau de trìo, participo ativamen à la reneissènço de la lengo prouvençalo, subre-tout à coumta de la duberturo de sa librarié, vertadié fougau de culturo prouvençalo.

Roumanille es manda au coulège de Tarascoun pèr aprendre lou latin, pèr deveni prèire, coume tóuti lis einat di famiho creserello d’aquéu tèms. Es un escoulan tras-qu’avantaja, tant en latin, qu'en françés, e en prouvençau. Es, parèis, à-n-aquelo epoco que se pren de passioun pèr lou prouvençau.

Quouro sort de l’escolo, Roumanille vòu pas rintra dins lis ordre e part à Nioun gagna sa vido.

Ié rescontro Jacinte Dupuy, Camihe Raybaud e Bartoumiéu Chalvet, pouèto prouvençau, e aquelo pichoto chourmo d'escrivan fai aqui ço que Mistral apelara en rèire "lou brès dóu Felibrige".

Roumanille quito Nioun en 1845 pèr lou pensiounat Dupuy en Avignoun ounte i’es coume mèstre repetidou. Aqui, s’amiga lèu em’ un dis escoulan que ié dison Frederi Mistral, que lou souspren d’escriéure de vers prouvençau.

Mau-grat la diferènci d'age e lou raport escoulan proufessour, se quitaran plus e saran au foundamen dóu Felibrige.

Dins aquelo pountannado e aquéu meme pensiounat, estudiavo un autre felibre en deveni, Ansèume Mathieu.

Aguènt quita lou pensiounat Dupuy, intro à l'estamparié Séguin e n’en prouficho pèr edita "Li Margarideto" (Les Pâquerettes) en 1847. Aquéu pichot recuei en vers, en quatre partido (representant li quatre sesoun) e escri soulamen en prouvençau marco la voulounta de Jóusè Roumanille de s'adreissa i prouvençau coumprenènt la Lengo Nostro.

Mai en aquéu moumen, Roumanille parlo dóu prouvençau coume d'uno lengo óublidado e à mand de s’avali.

Countinuo l'escrituro en vers prouvençau e publico en 1859 sis obro dins "Li Flour de Sàuvi" (Les fleurs de Sauge).

Avans acò, Jóusè Roumanille avié founda lou Felibrige, lou 21 de mai de 1854, emé si 6 coumpan pouèto prouvençau. Duerb gaire après uno librarié que sara lou fougau de la renèissenço de la culturo prouvençalo. Jóusè Roumanille devenguè editour e publiquè, en mai de l’obro "Li prouvençalo" en 1852, tambèn de recuei de pouèmo d’àutri pouèto prouvençau.

Jouguè un role primourdiau dins lou mounde literàri de Prouvènço, estènt au sourgènt de la respelido dóu prouvençau. Passara si trento darniéris annado à avena en conte "L'Armana Prouvençau". Faran de Roumanille lou digne eiretié de nòsti meiour countaire de l’Age-Mejan e de la Renèissenço.

Roumanille restara coume lou "Paire" dóu Felibrige, countaire dóu Curat de Cucugnan, que sara représ pèr Anfos Daudet, e creatour de la proso mouderno prouvençalo.

Es l'autour, en 1884, di Conte Prouvençau e di Cascareleto.

Roumanille defuntè lou 24 de mai de 1891, leissant darrié éu l'image d'un atour majourau dins l’espandimen de la culturo prouvençalo.