Frederi Mistral es nascu lou 8 de setèmbre de1830 à Maiano au "Mas du Juge".
Escrivan prouvençau, Frederi Mistral fuguè à l'iniciativo de la creacioun dóu Felibrige emé Jóusè Roumanille, Teoudor Aubanel, Jan Brunet, Ansèume Mathieu, Pau Giéra e Anfos Tavan.
Dins sa jouinesso passado au pèd dis Aupiho, Frederi Mistral n'a ausi que la lengo prouvençalo. A douge an, au pensiounat Dupuy, fai lou rescontre de Jóusè Roumanille, survihant dins l'establimen, que lou souspren d’escriéure de vers prouvençau.
D’aquéu moumen, acoumpagna d’ Ansèume Mathieu, coumpan de Frederi Mistral, creèron, sènso lou saupre, de-segur, la proumiero acampado felibrenco.

Frederi Mistral passè soun bacheleirat à Nime en 1847, pièi s’entournè au mas peirenau pèr s'óucupa de la terro.
L'agriculturo n'estènt pas sa passioun, un an plus tard vai à-z-Ais, pèr estudia lou dre. Es aqui que pren couneissènço de la noblo istòri de Prouvènço. Descuerb à-z-Ais la vido di tiatre e s'interèsso is obro di troubadou à la biblioutèco Méjanes. Après tres an d'estùdi, Mistral es diplouma e rintro à Maiano.
Sian en 1851, es un moumen impourtant ounte Mistral pren counsciènci de sa vertadiero envejo : faire renaisse la "vièio lengo" emé lou prestige de la pouësìo. Sara elegi Capoulié dóu Felibrige en 1876, un cop li proumiés estatut óuficiau publica.

D’en proumié es Jóusè Roumanille que ié fai coumença e acaba lou recuei Li Prouvençalo, pièi s'engrenon li dous coungrès de-z-Ais e d'Arle que precedaran la creacioun dóu Felibrige, lou 21 de mai de 1854, coutrìo emé Roumanille e li cinq àutri jóuini pouèto cita plus aut.

Soun pouèmo epi, “Mirèio” sara publica en 1859. Evoco de passioun soumeso à-n-une fatalita roumantico dins lou cadre ufanous e realisto de la Prouvènço roudanenco.
Aquelo obro rèsto vuei l’un di plus grand cap d'obro de la pouësìo prouvençalo, e meme françeso. Carle Gounod n’en fara un oupera en 1863.
Reçaupu membre de l'Acadèmi de Marsiho en 1887, daverara en 1904 lou prèmi Nobel de literaturo pèr l’ensèn de soun obro.
Vuech an après la publicacioun de "Mirèio", Mistral escriéu "Calendau", mounte aparèis encaro em’encaracioun la voulounta d'independènci di prouvençau.

Pièi Mistral s’abaudis dins un travai mounasti pèr deveni l'autour de "Lou Tresor dóu Felibrige" (1878-1886), que rèsto au jour de vuei lou diciounàri lou mai riche de la lengo d’O, e l'un di plus fisable pèr la precisioun di sèns. Es un diciounàri bilengo prouvençau-francés, en dous grand voulume que recampo l'ensèmble di dialèite d'o.

Emé soun travai e sis obro, Mistral a reabilita la lengo d’o en la pourtant au plus aut escaloun de la pouësìo epico.
Leissara tambèn en eiretage lou Museon Arlaten, museon founda en 1896, situa en Arle.

Defunto lou 25 de mars de 1914 à Maiano mounte es ensepeli.