Es nascu lou 26 de mars de 1829 en Avignoun, dins uno famiho d’estampaire (Estampaire de Sa Santeta lou Papo e de l’archevesque d’Avignoun).
Fai sis estùdi à-z-Ais avans de tourna veni travaia dins l’empremarié famihalo.
Pouèto malancòni e utoupisto, escriéu de recuei de dramo e de pouësìo lirico.
Dins sa famiho bourgeso, se parlo gaire prouvençau, mai Teoudor Aubanel s’aviso qu’aquelo lengo es vivènto à soun entour, dins li carriero e li campagno d’Avignoun e meme dins soun oustau ounte un vièi ouncle s’entestardis à parla que prouvençau.

Catouli, coume touto sa famiho, seguis li reünioun de la Soucieta de la Fe mounte rescontro Jóusè Roumanille, que ié presènto Frederi Mistral e Ansèume Mathieu. Intro alor dins lou groupe di ‘’Primadié’’ e participo en 1854, à la foundacioun dóu Felibrige au Castèu de Font-Segugno. Participo à la creacioun de l’Armana Prouvençau.
Liga d’amista emé d’àutris escrivan coume Anfos Daudet e Pau Arène, sara au dire di gènt emé Frederi Mistral e Jóusè Roumanille un di tres cepoun de la respelido de la culturo prouvençalo.

Si proumiéri pouësìo soun publicado pèr soun ami Roumanille dins Li Prouvençalo en 1852.

En 1860, publico ‘’La mióugrano entre-duberto’’ qu’a uno acuiènço ufanouso dins lou mounde literàri, mounte canto soun amour perdu pèr Zani. Mai l’obro es foro-bandido pèr li catouli avignounen e amenaço l’empremarié ligado emé l’archevescat.
Se marido fin-finalo en 1861 emé Jóusefino Mazen. Retrobo goust à la vido, escriéu mai arrèsto de publica sis obro.
Sis obro saran publicado, poustumo, pèr l’empremarié famihalo Aubanel e en particulié en 1899, un recuei de pouësìo ‘’Lou Rèire-Soulèu’’ que repren li dous dramo ‘’Lou Raubatòri’’ e ‘’Lou Pastre’’ abandouna après la sancioun episcoupalo.

D’efèt, en 1885, soun sensuau recuei pouëti ‘’Li Fiho d’Avignoun’’ ié vauguè d’èstre foro-bandi de la soucieta catoulico avignounenco. Fuguè tamben bleima pèr l’archevesque d’Avignoun, Mgr Vigne, que l’óubliguè de leva soun obro. N’en sourtiguè aclapa e maucoura.

Defuntè lou 31 d’óutobre de 1886 en Avignoun dins soun oustau au 9 de la plaço Sant-Pèire, magagna d’uno apoupleissìo quàuqui jour avans. Es ensepeli au cementèri Sant-Veran en Avignoun.

I’a tambèn soun bust dins lou jardin publi Agricol Perdiguier en Avignoun e dins lou Jardin di Felibre à Scèus (Lis Aut-de-Sèino).